АҚШ президентлигига Демократик партиядан номзод Ҳиллари Клинтоннинг штаби жамоатчиликка унинг саломатлиги ҳақида хабар бермаслик қарори нотўғри бўлганини тан олди, деб ёзади «РБК» Клинтоннинг кампанияси матбуот котиби Брайан Фэллонга таяниб.
«Ҳодисани кўриб чиқиб, айтишим мумкинки, биз буни яхшироқ ҳал қила олишимиз мумкин эди, биз ахборотни тезкорроқ тақдим этишимиз керак эди. Бу бизнинг айбимиз, ва биз бундан афсусдамиз», — деди Фэллон.
Унинг сўзларига кўра, (11 сентябрь терактлари қурбонлари хотирасига бағишланган мотам тадбири чоғида оёғида зўрға турган Клинтонни машинага ўтирғизишаётгани акс этган видео эълон қилинганидан кейинги) 90 дақиқа давомида штабдагилар президентликка номзоднинг аҳволи жойидалигига ишонч ҳосил қилиш билан банд бўлган.
У штаб яқин бир неча кун ичида Клинтон ҳақидаги қўшимча «тиббий маълумот»ни ошкор қилиш ниятида эканлигини қўшиб қўйди.
Дастлаб, номзоднинг штабида мотам тадбиридаги ҳодисани «ортиқча қизиб кетиш» билан изоҳлашди. Аммо кейинроқ Reuters агентлиги 9 сентябрдаёқ Клинтоннинг шифокори унга пневмония ташхисини қўйганини, номзоднинг мазаси қочишига антибиотиклар ва сувсизланиш биргаликда сабаб бўлганини хабар қилди.
Эслатиб ўтамиз, Ҳиллари Клинтон 11 сентябрь терактларига бағишланган мотам маросимида ўзини нохуш ҳис этди ва Калифорния ҳамда Невадага сайловолди сафарларини бекор қилди.
Изоҳ (0)