Estoniya yer egalari markaziy uyushmasi Tallinda mamlakat parlamenti binosi oldiga 10 mingta bir litrli sut idishlarni terib chiqdi, deya xabar bermoqda “TASS”.
Parlament kuzgi sessiyasi birinchi yig‘ilishi kuni tashkil etilgan mazkur aksiya yordamida fermerlar deputatlar e’tiborini Yevroittifoqning Rossiyaga qarshi sanksiyalari va Rossiyaning javob choralari sabab sohada zarar ortib borayotganiga qaratishga harakat qildi.
“Har bir idish bizga oxirgi ikki yil davomida noxush iqtisodiy muhit tufayli chet elga yuborilgan yoki so‘yilgan Yevropadagi eng yaxshi sigirlar haqida eslatsin. Jonivorlarning soni kamaygan sari qishloq joylaridagi ish o‘rinlari ham qisqarib bormoqda”, — deya ta’kidladi aksiya tashkilotchilaridan biri, uyushma boshqaruvi raisi Vaxur Tinissoo.
Estoniya sut ishlab chiqaruvchilar uyushmasi raisi Yaanus Murakasning bildirishicha, o‘tgan yili sutning xarid narxi uchdan biriga pasayib ketgani tufayli tarmoq juda katta zarar ko‘rmoqda.
Estoniya statistika departamenti ma’lumotlariga ko‘ra, 2015-yilda mamlakatning Rossiyaga eksporti hajmi 35 foiz yoki 400 million yevrodan ko‘proqqa qisqargan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)