Toshkent shahri va viloyatiga keluvchilarni vaqtinchalik ro‘yxatga olishning yangi tartibi tasdiqlandi. Bu haqdagi buyruq 16-may kuni O‘zbekiston ichki ishlar vaziri Adham Ahmadboyev tomonidan imzolandi, deb xabar beradi Uz24.
Hujjat matni “Lex.uz” portaliga joylashtirildi. Unga ko‘ra, endilikda poytaxtga keluvchilarni ro‘yxatga olish bilan Toshkent shahar IIBB xorijga chiqish-kelish va fuqarolikni rasmiylashtirish bo‘limi (XChK va FRB) shug‘ullanadi. Hisobga olish muddati — besh kundan olti oygacha. Talabalar butun o‘qish vaqtiga ro‘yxatdan o‘tkaziladi. Toshkentda besh kundan kamroq turadiganlar ro‘yxatdan o‘tkazilmaydi.
Ro‘yxatga qo‘yilgan fuqaro belgilangan muddat davomida poytaxtda ishlash huquqini qo‘lga kiritadi.
Vaqtinchalik ro‘yxatdan o‘tish uchun quyidagi hujjatlar talab etiladi:
- ariza;
- pasport;
- tug‘ilganlik haqidagi guvohnoma va 3,5X4,5 o‘lchamdagi ikkita fotosurat (16 yoshga to‘lmaganlar uchun);
- uy-joy egalik huquqini tasdiqlovchi hujjatlar nusxasi;
- davlat boji to‘langanligi haqida kvitansiya.
Bundan tashqari, uy-joy yoki uning bir qismi ijarasi haqidagi notarial tasdiqlangan shartnoma nusxasi yoxud uy-joydan yoki uning bir qismidan bepul foydalanish shartnomasi nusxasi taqdim etilishi lozim.
Ro‘yxatga qo‘yilayotgan fuqaro uy egasining yaqin qarindoshi bo‘lgan taqdirda ijara shartnomasi nusxasi talab etilmaydi — uning o‘rniga qarindoshlik darajasini tasdiqlovchi hujjat taqdim etiladi.
Ro‘yxatga olinganlik haqidagi varaqa XChK va FRB inspektori tomonidan ariza ro‘yxatdan o‘tkazilishi, hujjatlar o‘rganib chiqilishi va rasmiylashtirilishi bilan, o‘sha kuniyoq taqdim etiladi.
Hisobga olish muddatining uzaytirilishini rad etishga asos bo‘lib fuqaroning Toshkent shahri va viloyatidagi yashash joyi bo‘yicha muntazam ravishda qonunbuzarlikka yo‘l qo‘yishi, noto‘g‘ri hujjatlar taqdim etishi, shaharda jamoat tartibining buzilishiga sharoit yaratayotgani haqidagi ma’lumotlar xizmat qilishi mumkin.
Registratsiyani qaytadan rasmiylashtirish bilan ham XChK va FRB shug‘ullanadi. Buning uchun registratsiya tugashidan 15 kun oldin bo‘limga yuqorida keltirilgan ro‘yxat bo‘yicha hujjat topshirish talab etiladi.
Ro‘yxatga olinganlik haqidagi varaqa faqat pasport yoki harbiy xizmatchining guvohnomasi taqdim etilgan taqdirdagina amal qiladi. Varaqa yo‘qolgan yoki yaroqsiz holga kelgan bo‘lsa, XChK va FRBga murojaat qilish lozim.
Toshkent shahri va viloyatida vaqtinchalik ro‘yxatdan o‘tish bu yerda uy sotib olish, doimiy ishga joylashish yoki ijtimoiy kafolatlar olish uchun asos bo‘lib xizmat qilmaydi.
Izoh (0)