Тошкент шаҳри ва вилоятига келувчиларни вақтинчалик рўйхатга олишнинг янги тартиби тасдиқланди. Бу ҳақдаги буйруқ 16 май куни Ўзбекистон ички ишлар вазири Адҳам Аҳмадбоев томонидан имзоланди, деб хабар беради Uz24.
Ҳужжат матни «Lex.uz» порталига жойлаштирилди. Унга кўра, эндиликда пойтахтга келувчиларни рўйхатга олиш билан Тошкент шаҳар ИИББ хорижга чиқиш-келиш ва фуқароликни расмийлаштириш бўлими (ХЧК ва ФРБ) шуғулланади. Ҳисобга олиш муддати — беш кундан олти ойгача. Талабалар бутун ўқиш вақтига рўйхатдан ўтказилади. Тошкентда беш кундан камроқ турадиганлар рўйхатдан ўтказилмайди.
Рўйхатга қўйилган фуқаро белгиланган муддат давомида пойтахтда ишлаш ҳуқуқини қўлга киритади.
Вақтинчалик рўйхатдан ўтиш учун қуйидаги ҳужжатлар талаб этилади:
- ариза;
- паспорт;
- туғилганлик ҳақидаги гувоҳнома ва 3,5Х4,5 ўлчамдаги иккита фотосурат (16 ёшга тўлмаганлар учун);
- уй-жой эгалик ҳуқуқини тасдиқловчи ҳужжатлар нусхаси;
- давлат божи тўланганлиги ҳақида квитанция.
Бундан ташқари, уй-жой ёки унинг бир қисми ижараси ҳақидаги нотариал тасдиқланган шартнома нусхаси ёхуд уй-жойдан ёки унинг бир қисмидан бепул фойдаланиш шартномаси нусхаси тақдим этилиши лозим.
Рўйхатга қўйилаётган фуқаро уй эгасининг яқин қариндоши бўлган тақдирда ижара шартномаси нусхаси талаб этилмайди — унинг ўрнига қариндошлик даражасини тасдиқловчи ҳужжат тақдим этилади.
Рўйхатга олинганлик ҳақидаги варақа ХЧК ва ФРБ инспектори томонидан ариза рўйхатдан ўтказилиши, ҳужжатлар ўрганиб чиқилиши ва расмийлаштирилиши билан, ўша куниёқ тақдим этилади.
Ҳисобга олиш муддатининг узайтирилишини рад этишга асос бўлиб фуқаронинг Тошкент шаҳри ва вилоятидаги яшаш жойи бўйича мунтазам равишда қонунбузарликка йўл қўйиши, нотўғри ҳужжатлар тақдим этиши, шаҳарда жамоат тартибининг бузилишига шароит яратаётгани ҳақидаги маълумотлар хизмат қилиши мумкин.
Регистрацияни қайтадан расмийлаштириш билан ҳам ХЧК ва ФРБ шуғулланади. Бунинг учун регистрация тугашидан 15 кун олдин бўлимга юқорида келтирилган рўйхат бўйича ҳужжат топшириш талаб этилади.
Рўйхатга олинганлик ҳақидаги варақа фақат паспорт ёки ҳарбий хизматчининг гувоҳномаси тақдим этилган тақдирдагина амал қилади. Варақа йўқолган ёки яроқсиз ҳолга келган бўлса, ХЧК ва ФРБга мурожаат қилиш лозим.
Тошкент шаҳри ва вилоятида вақтинчалик рўйхатдан ўтиш бу ерда уй сотиб олиш, доимий ишга жойлашиш ёки ижтимоий кафолатлар олиш учун асос бўлиб хизмат қилмайди.
Изоҳ (0)