Rossiya bosh prokuraturasi muxolifatdagi siyosatchi Boris Nemsovning o‘ldirilishiga oid jinoiy ishni sudga yubordi. Bu haqda muassasa rasmiy vakili Aleksandr Kurennoy ma’lum qildi, deya xabar beradi “Interfaks”.
“Rossiya bosh prokurori o‘rinbosari Viktor Grin Zaur Dadayev, Anzor va Shadid Gubashevlar, Temirlan Eskerxanov va Xamzat Baxayevga nisbatan jinoiy ish bo‘yicha ayblov xulosasini tasdiqladi. Ish ko‘rib chiqish uchun Moskva okrug harbiy sudiga yuborildi”, — deya ta’kidlagan Kurennoy.
Tergov taxminiga ko‘ra, 2014-yil sentabri oxirida yuqorida nomlari tilga olingan fuqarolar kamida 15 million rubl mukofot evaziga Ruslan Muhiddinov va boshqa aniqlanmagan shaxslarning Nemsovni o‘ldirish haqidagi taklifiga rozilik bildirgan.
“Ruslan Muhiddinov va boshqa aniqlanmagan shaxslar xalqaro qidiruvga berilgan. Ularga nisbatan jinoiy ish davom etmoqda”, — deya ma’lum qildi bosh prokuratura vakili.
Izoh (0)