Россия бош прокуратураси мухолифатдаги сиёсатчи Борис Немцовнинг ўлдирилишига оид жиноий ишни судга юборди. Бу ҳақда муассаса расмий вакили Александр Куренной маълум қилди, дея хабар беради «Интерфакс».
«Россия бош прокурори ўринбосари Виктор Гринь Заур Дадаев, Анзор ва Шадид Губашевлар, Темирлан Эскерханов ва Хамзат Бахаевга нисбатан жиноий иш бўйича айблов хулосасини тасдиқлади. Иш кўриб чиқиш учун Москва округ ҳарбий судига юборилди», — дея таъкидлаган Куренной.
Тергов тахминига кўра, 2014 йил сентябри охирида юқорида номлари тилга олинган фуқаролар камида 15 миллион рубль мукофот эвазига Руслан Муҳиддинов ва бошқа аниқланмаган шахсларнинг Немцовни ўлдириш ҳақидаги таклифига розилик билдирган.
«Руслан Муҳиддинов ва бошқа аниқланмаган шахслар халқаро қидирувга берилган. Уларга нисбатан жиноий иш давом этмоқда», — дея маълум қилди бош прокуратура вакили.
Изоҳ (0)