AQSh Markaziy razvedka boshqarmasi direktori Jon Brennan IShID ekstremistik guruhi terrorchilari tomonidan AQShda 28-iyun, seshanba kuni Turkiyada sodir etilganidek terakt rejalashtirilayotgani ehtimolini istisno qilmadi, deb yozadi “TASS”.
“Agar IShID bunday hujumni AQShda uyushtirishga urinmasa, taajjubda qolaman, — dedi u. — Turkiya aeroportida sodir bo‘lgan hodisaga qarang, u yerda portlovchi moddali kamarlardan foydalanishdi, ularni tayyorlash unchalik qiyin emas”.
Shu bilan birga, Brennan terakt ortida aynan shu guruh jangarilari turganini shunchaki taxmin qildi, xolos. “IShID odatda teraktlarni xudkushlar ishtirokida amalga oshiradi”, — deya aniqlik kiritdi u IShIDning chet elda hujumlar uyushtirishi ehtimoliga xavotir bilan yondashishini ta’kidlar ekan.
Eslatib o‘tamiz, Turkiyaning Istanbul shahridagi Otaturk nomli xalqaro aeroportda sodir etilgan terakt oqibatida hayotdan ko‘z yumganlar soni 43 nafarga yetgani hamda ular orasida O‘zbekiston fuqarosi borligi haqida xabar berilgandi. Jarohatlanganlar soni 147 kishini tashkil qilmoqda.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)