Buyuk Britaniyaning mehnat va sobiq mudofaa vazirlari hukumatni boshqarish uchun kurashishlarini ma’lum qildi

Buyuk Britaniya sobiq mudofaa vaziri va yevrotanqidchi Liam Foks 29-iyun, chorshanba kuni Konservativ partiya yetakchisi va hukumat rahbari lavozimi uchun kurashda ishtirok etishini ma’lum qildi. Shu kuni bunday niyatini mehnat vaziri Stiven Krebb ham oshkor etdi. Bu haqda “Interfaks” xabar bermoqda.

Yaqin orada boshqa siyosatchilar ham shunga o‘xshash bayonotlar bilan chiqishi kutilmoqda. Jumladan, Londonning sobiq meri va Brexit kampaniyasi faoli Boris Jonson bunga kirishishi aytilmoqda. Yuqori lavozim uchun kurashda yetakchilar qatorida mamlakat ichki ishlar vaziri Tereza Mey nomi ham tilga olinmoqda.

Eslatib o‘tamiz, mamlakatni olti yil davomida boshqarib kelgan bosh vazir Devid Kemeron qirollik aholisi referendumda Yevropa Ittifoqini tark etish uchun ovoz berganidan so‘ng iste’foga chiqishini ma’lum qilgandi.