Facebook yaqin bir necha hafta ichida foydalanuvchilarning yangiliklar tasmasidagi materiallar namoyishi algortmini yana yangilaydi, deb yozadi “RBK” ijtimoiy tarmoq korporativ blogiga tayanib.
Xabarda aytilishicha, foydalanuvchining qarindosh va do‘stlari bilan bog‘liq yangiliklarga ustunlik beriladi. “Facebook odamning do‘stlari va oilasi bilan aloqalari g‘oyasi asosiga qurilgan. Bu bizning yangiliklar tasmamizda bugun ham asosiy tamoyil bo‘lib qoladi”, — deyiladi kompaniya xabarida.
Algoritm tasmada do‘st va qarindoshlarning foto, video va statuslarini yuqoriga ko‘taradi. Aniqlik kiritilishicha, bu do‘stlari ko‘p bo‘lgan foydalanuvchilarga yaqin kishilari bilan bog‘liq yangiliklarni ko‘zdan qochirmaslikka yordam beradi.
Endi oila a’zolari va do‘stlarning postlari kompaniya va OAVlarning postlaridan ko‘ra ko‘proq ko‘rsatiladi, bu esa Facebook‘dan trafik yo‘qolishiga olib kelishi mumkin.
Izoh (0)