O‘zbekistonda Tayvan yetakchi smartfonlar ishlab chiqaruvchisining oxirgi yangiligi — HTC 10 modeli sotuvi boshlandi. Qurilma yuqori aniqlikdagi ekran, kuchli protsessor va mustahkam himoyalangan metall korpus bilan jihozlangan. An’anaga ko‘ra, ishlab chiqaruvchi kamera va tovushga alohida e’tibor bergan, deya xabar qiladi “Mobinfo.uz”.
Asosiy 12 megapikselli kamera UltraPixel texnologiyasida bajarilgan va lazer avtofokus bilan jihozlangan. Uning ishga tushirilishi uchun atigi 0,6 soniya talab etiladi. Shuningdek, Canon va Nikon professional fotokameralari kabi RAW shaklida foto olish mumkin.
HTC 10 16 bitlidan 24 bitli audioga, shuningdek, raqamlidan analogli formatga konvertatsiya imkoniyatiga ega birinchi smartfon bo‘ldi. Dinamiklar BoomSound texnologiyasida bajarilgan va telefonning yuqori hamda pastki qismlarida joylashgan. Super LCD texnologiyasi bo‘yicha tayyorlangan displey HTC M9 ga nisbatan 30 foizga yorqinroq va 50 foizga ta’sirchanroq.
Smartfon kundalik eskirish, ehtimoliy qulash va zarbalarga chidamli qilib tayyorlangan. Sinovlar -20 dan +60 darajagacha bo‘lgan favqulodda haroratlarda bo‘lib o‘tgan, qurilma 10 ming marotaba turli yuzalarga tashlab yuborilgan, egilish, tirnalish va korroziyaga bardoshlilik bo‘yicha sinalgan.
HTC 10 Toshkentda 4,9 million so‘mdan taklif etilmoqda. Taqqoslash uchun, bu pulga hatto iPhone 6S Plus sotib olish mumkin.
Ushbu qurilmani ko‘rsatilgan narxda sotib olishga “Daryo” nashri kafolat bermaydi. Qurilma va uning narxi haqidagi axborot faqat tanishish uchun taqdim etilgan.
Izoh (0)