“Kasperskiy laboratoriyasi” tadqiqot o‘tkazib, internet foydalanuvchilarining chet eldagi xatti-harakatlarini o‘rgandi va ular bunday safarlari chog‘ida qanday onlayn-xatarlarga uchrashi mumkinligini aniqladi, deb yozadi “Infocom.uz”. Butun dunyo bo‘yicha jami 11 850 kishi orasida so‘rov o‘tkazildi.
Aniqlanishicha, sayohatchilarning 44 foizi uchib kelishi bilan internetga kiradi. Ularning 69 foizi yaqinlariga sog‘-omon yetib kelganini bildirishga oshiqsa, 39 foizi sayohat uchun zarur ma’lumotni olmoqchi bo‘ladi, 34 foizi ijtimoiy tarmoqlarga kiradi, 38 foizi esa xizmat yuzasidan internatdan foydalanishga majbur bo‘ladi, so‘ralganlarning yana 34 foizi shunchaki odat bo‘yicha internetni “ziyorat qiladi”.
Bepul Wi-Fi orqali internetga ulanish doim ham xavfsiz bo‘lavermaydi, yaxshi himoyalanmagan kanal bo‘yicha uzatiladigan shaxsiy ma’lumotlarni yovuz niyatlilar qo‘lga kiritishi mumkin. “Kasperskiy laboratoriyasi” statistikasiga ko‘ra, Tailand (43%) va Fransiyada (40%) jamoatchilik tarmoqlariga ulanishda xavf ayniqsa katta.
Sayohatchilarning ehtiyotsizligi qayg‘uli oqibatlarga olib kelishi mumkin. Masalan, foydalanuvchilarning 18 foizi xorijda turib kiberjinoyatchilar qurboniga aylangan. Uyidan uzoqda oddiy jinoyatlar qurbonlariga aylanganlar esa 6 foizni tashkil etdi.
Izoh (0)