Rossiya prezidenti Vladimir Putin Kirov viloyati gubernatori Nikita Belix hibsga olinganidan xabardor. Bu haqda davlat rahbari matbuot kotibi Dmitriy Peskov ma’lum qildi, deya xabar beradi “Interfaks”.
“Tabiiyki, prezidentga bu haqda yetkazilgan. Huquq-tartibot va tergov idoralari mustaqil faoliyat yuritadi, shuning uchun qandaydir oldindan maslahatlashuvlar haqida gap bo‘lishi mumkin emas”, — deya ta’kidlagan Peskov prezidentning bu haqda ogohlantirilgani haqidagi savolga javoban.
Kirov gubernatori lavozimidan chetlatilishi haqidagi savolga javob qaytarar ekan, Peskov “Lavozimdan chetlatish to‘g‘risidagi qarorni prezident qabul qiladi, buni oldindan aytishning iloji yo‘q. Umuman olganda esa, Belix masalasida shunday deyish mumkin: tergov tekshiradi, ayblov ayblaydi, himoya esa himoya qiladi. Har kimning qonunda ko‘zda tutilgan tegishli huquqlari bor, sud qaroriga qadar hech kimni aybdor deb bo‘lmaydi”, — deya munosabat bildirgan.
Izoh (0)