Yaponiya bosh vaziri Sindzo Abe yaqin orada AQSh harbiy-dengiz kuchlarining Gavayi orollaridagi Pyorl-Xarbor bazasiga tashrif buyurmoqchi emas. Bu haqda hukumat rahbari AQSh prezidenti Barak Obama bilan ikki tomonlama uchrashuv yakunlariga ko‘ra ma’lum qildi, deb yozadi “TASS”.
“Ayni paytda menda Gavayiga tashrif buyurish bo‘yicha aniq rejalar yo‘q”, — dedi u.
Avvalroq Yaponiya OAVlari Abe Obamaning Xirosimaga safariga javoban Pyorl-Xarborga tashrif uyushtirishi mumkinligi haqida xabar bergan edi.
1941-yil 7-dekabrida Yaponiya imperator floti Pyorl-Xarborga to‘satdan zarba bergan, natijada Ikkinchi jahon urushining Tinch okeani kampaniyasi boshlanib ketgan edi. O‘shanda Amerikaning yettita harbiy kemasi cho‘kib ketgan, yana sakkizta kema esa jiddiy zarar ko‘rgan, 2,4 mingdan ziyod kishi halok bo‘lgan edi. Yaponiya tomoni esa 25 ta samolyot va 55 kishini yo‘qotgan edi.
1945-yil 6-avgustda esa Amerikaning B-29 bombardimonchisi Xirosimaga to‘rt tonnali uran bombasini tashladi, portlashdan shu zahotiyoq 70 mingdan 100 minggacha bo‘lgan kishi halok bo‘ldi. Tirik qolganlarning ko‘pchiligi keyinchalik nurlanish kasalligidan vafot etdi. Atom zarbasi qurbonlarining umumiy soni 2015-yil 6-avgust holatiga ko‘ra, 297 684 kishini tashkil qildi.
Izoh (0)