Япония бош вазири Синдзо Абэ яқин орада АҚШ ҳарбий-денгиз кучларининг Гавайи оролларидаги Пёрл-Харбор базасига ташриф буюрмоқчи эмас. Бу ҳақда ҳукумат раҳбари АҚШ президенти Барак Обама билан икки томонлама учрашув якунларига кўра маълум қилди, деб ёзади «ТАСС».

«Айни пайтда менда Гавайига ташриф буюриш бўйича аниқ режалар йўқ», — деди у.

Аввалроқ Япония ОАВлари Абэ Обаманинг Хиросимага сафарига жавобан Пёрл-Харборга ташриф уюштириши мумкинлиги ҳақида хабар берган эди.

1941 йил 7 декабрида Япония император флоти Пёрл-Харборга тўсатдан зарба берган, натижада Иккинчи жаҳон урушининг Тинч океани кампанияси бошланиб кетган эди. Ўшанда Американинг еттита ҳарбий кемаси чўкиб кетган, яна саккизта кема эса жиддий зарар кўрган, 2,4 мингдан зиёд киши ҳалок бўлган эди. Япония томони эса 25 та самолёт ва 55 кишини йўқотган эди.

1945 йил 6 августда эса Американинг B-29 бомбардимончиси Хиросимага тўрт тоннали уран бомбасини ташлади, портлашдан шу заҳотиёқ 70 мингдан 100 минггача бўлган киши ҳалок бўлди. Тирик қолганларнинг кўпчилиги кейинчалик нурланиш касаллигидан вафот этди. Атом зарбаси қурбонларининг умумий сони 2015 йил 6 август ҳолатига кўра, 297 684 кишини ташкил қилди.