“Al-Ayn” futbol klubiga qarshi Osiyo Chempionlar Ligasi guruh bosqichi 5-tur uchrashuvidan so‘ng o‘z fikrlari bilan o‘rtoqlashgan “Nasaf” jamoasi bosh murabbiyi Ro‘ziqul Berdiyev musobaqa nimchorak final yo‘llanmasi uchun kurash oxirigacha davom etishini ma’lum qildi. Bu haqda “Championat.asia” internet-nashri xabar bermoqda.
Eslatib o‘tamiz, “Nasaf” — “Al-Ayn” uchrashuvi 1:1 hisobidagi durang natija bilan yakuniga yetdi. “Nasaf” himoyachisi Maqsud Karimov urgan gol OChLning 2016-yilgi mavsumidagi eng tezkor ikkinchi gol bo‘ldi.
“Hisobni ochganimizdan so‘ng tashabbusni ‘Al-Ayn’ga berib qo‘ydik. Shunga qaramay, gol urish uchun imkoniyatlarimiz bo‘ldi. Qator yetakchilarimizdan foydalana olmadik. Ammo ularning o‘rniga tushgan futbolchilar yomon harakat qilishmadi”, — dedi Ro‘ziqul Berdiyev.
“‘Al-Ayn’ ancha kuchli jamoa, bugun ularga qarshi yetarlicha qarshilik ko‘rsatdik. O‘yindan so‘ng futbolchilarga minnatdorchilik bildirdim. Hali musobaqadan chiqib ketganimiz yo‘q, oxirigacha kurashamiz”, — dedi “Nasaf” ustozi.
“Bizga legionerlar futbolchilar kerak. Bu masalada rahbariyat bilan gaplashganmiz. Lekin hozircha o‘zimiz istagan futbolchini olishga imkoniyatimiz yo‘q”, — deya qo‘shimcha qildi “Nasaf” bosh murabbiyi Ro‘ziqul Berdiyev.
“D” guruhida so‘nggi — 6-tur uchrashuvlari 3-may kuni bo‘lib o‘tadi. Shu kuni “Nasaf” BAAda “Al-Ayn” mehmoni bo‘ladi. “Nasaf” hisobida hozircha 5, “Al-Ayn” hisobida 7 ochko bor. Guruhda Qatarning “Al-Jaish” 10 ochko bilan peshqadamlik qilmoqda, so‘nggi o‘rindagi “Al-Ahli” (Saudiya Arabistoni) hisobida 3 ochko bor.
Izoh (0)