Qarshining “Nasaf” futbol klubi yarim himoyachisi Artur Gevorkyan Osiyo Chempionlar Ligasi guruh bosqichi 5-turi doirasida BAAning “Al-Ayn” jamoasiga qarshi uchrashuvdan so‘ng O‘zMTRKning “Sport” telekanaliga qisqa intervyu berdi.
Eslatib o‘tamiz, “Nasaf” — “Al-Ayn” uchrashuvi 1:1 hisobidagi durang natija bilan yakuniga yetdi. “Nasaf” himoyachisi Maqsud Karimov urgan gol OChLning 2016-yilgi mavsumidagi eng tezkor ikkinchi gol bo‘ldi.
“Har uch-to‘rt kunda o‘yin o‘tkazishimizga to‘g‘ri kelyapti. Shu sababli jismoniy jihatdan qiyin bo‘lyapti. Zaxiradan tushganlar o‘yinga yangi havo olib kirishga urinyapti, biroq yukning katta qismi baribir asosiy tarkibga tushmoqda”, — dedi Gevorkyan.
“‘Al-Ayn’ga qarshi o‘yinda juda erta gol urdik, yana gol ursak bo‘lardi. Ayniqsa, ikkinchi taym oxirida vaziyatlar bo‘ldi. Agar yaratilgan imkoniyatlarning yarmidan foydalana olganimizda ham, bugun g‘alaba qozongan bo‘lardik”, —dedi “Nasaf” yetakchisi.
“Bizda hali ham imkoniyat bor. ‘Al-Ayn’ga qarshi javob o‘yiniga faqat g‘alaba maqsadi bilan boramiz”, — dedi “Nasaf” sardori Artur Gevorkyan.
“D” guruhida so‘nggi — 6-tur uchrashuvlari 3-may kuni bo‘lib o‘tadi. Shu kuni “Nasaf” BAAda “Al-Ayn” mehmoni bo‘ladi. “Nasaf” hisobida hozircha 5, “Al-Ayn” hisobida 7 ochko bor. Guruhda Qatarning “Al-Jaish” 10 ochko bilan peshqadamlik qilmoqda, so‘nggi o‘rindagi “Al-Ahli” (Saudiya Arabistoni) hisobida 3 ochko bor.
Izoh (0)