«Ал-Айн» футбол клубига қарши Осиё Чемпионлар Лигаси гуруҳ босқичи 5-тур учрашувидан сўнг ўз фикрлари билан ўртоқлашган «Насаф» жамоаси бош мураббийи Рўзиқул Бердиев мусобақа нимчорак финал йўлланмаси учун кураш охиригача давом этишини маълум қилди. Бу ҳақда «Championat.asia» интернет-нашри хабар бермоқда.
Эслатиб ўтамиз, «Насаф» — «Ал-Айн» учрашуви 1:1 ҳисобидаги дуранг натижа билан якунига етди. «Насаф» ҳимоячиси Мақсуд Каримов урган гол ОЧЛнинг 2016 йилги мавсумидаги энг тезкор иккинчи гол бўлди.
«Ҳисобни очганимиздан сўнг ташаббусни ‘Ал-Айнъга бериб қўйдик. Шунга қарамай, гол уриш учун имкониятларимиз бўлди. Қатор етакчиларимиздан фойдалана олмадик. Аммо уларнинг ўрнига тушган футболчилар ёмон ҳаракат қилишмади», — деди Рўзиқул Бердиев.
«‘Ал-Айн’ анча кучли жамоа, бугун уларга қарши етарлича қаршилик кўрсатдик. Ўйиндан сўнг футболчиларга миннатдорчилик билдирдим. Ҳали мусобақадан чиқиб кетганимиз йўқ, охиригача курашамиз», — деди «Насаф» устози.
«Бизга легионерлар футболчилар керак. Бу масалада раҳбарият билан гаплашганмиз. Лекин ҳозирча ўзимиз истаган футболчини олишга имкониятимиз йўқ», — дея қўшимча қилди «Насаф» бош мураббийи Рўзиқул Бердиев.
«Д» гуруҳида сўнгги — 6-тур учрашувлари 3 май куни бўлиб ўтади. Шу куни «Насаф» БААда «Ал-Айн» меҳмони бўлади. «Насаф» ҳисобида ҳозирча 5, «Ал-Айн» ҳисобида 7 очко бор. Гуруҳда Қатарнинг «Ал-Жаиш» 10 очко билан пешқадамлик қилмоқда, сўнгги ўриндаги «Ал-Аҳли» (Саудия Арабистони) ҳисобида 3 очко бор.
Изоҳ (0)