“Nasaf” futbol klubiga qarshi Osiyo Chempionlar Ligasi guruh bosqichi 5-tur uchrashuvidan so‘ng o‘z fikrlari bilan o‘rtoqlashgan “Al-Ayn” bosh murabbiyi Zlatko Dalich “Nasaf”ning tezkor goli rejalarni buzib yuborganini tan oldi. Bu haqda “Championat.asia” internet-nashri xabar bermoqda.
Eslatib o‘tamiz, “Nasaf” — “Al-Ayn” uchrashuvi 1:1 hisobidagi durang natija bilan yakuniga yetdi. “Nasaf” himoyachisi Maqsud Karimov urgan gol OChLning 2016-yilgi mavsumidagi eng tezkor ikkinchi gol bo‘ldi.
“O‘yin biz uchun juda qiyin kechdi. ‘Nasaf’ning tezkor goli rejalarimizni o‘zgartirib yubordi. Birinchi bo‘limda 3:1 hisobida g‘alaba qozonishimiz kerak edi. Tezkor gol o‘tkazib yuborganimiz sabab, g‘alaba qozona olmadik”, — dedi “Al-Ayn” ustozi.
“Har ikkala jamoa keyingi bosqichga chiqish imkoniyatini saqlab qoldi. “Nasaf” tarkibida tezkor futbolchilar yetarli. Raqib qarshi hujumlarda juda xavfli o‘ynaydi. Biroq, barchasi o‘z qo‘limizda — keyingi o‘yindagi g‘alaba bizga keyingi bosqich yo‘llanmasini taqdim etadi”, — deya qo‘shimcha qildi “Al-Ayn” bosh murabbiyi Zlatko Dalich.
“D” guruhida so‘nggi — 6-tur uchrashuvlari 3-may kuni bo‘lib o‘tadi. Shu kuni “Nasaf” BAAda “Al-Ayn” mehmoni bo‘ladi. “Nasaf” hisobida hozircha 5, “Al-Ayn” hisobida 7 ochko bor. Guruhda Qatarning “Al-Jaish” 10 ochko bilan peshqadamlik qilmoqda, so‘nggi o‘rindagi “Al-Ahli” (Saudiya Arabistoni) hisobida 3 ochko bor.
Izoh (0)