“Nasaf” futbol klubiga qarshi Osiyo Chempionlar Ligasi guruh bosqichi 5-tur uchrashuvidan so‘ng o‘z fikrlari bilan o‘rtoqlashgan “Al-Ayn” jamoasi yetakchi yarim himoyachisi Umar Abdulrahmon o‘zbekistonlik futbolchilarning tezkor golidan dovdirab qolmaganini ma’lum qildi. Bu haqda “Championat.asia” internet-nashri xabar bermoqda.
Eslatib o‘tamiz, “Nasaf” — “Al-Ayn” uchrashuvi 1:1 hisobidagi durang natija bilan yakuniga yetdi. “Nasaf” himoyachisi Maqsud Karimov urgan gol OChLning 2016-yilgi mavsumidagi eng tezkor ikkinchi gol bo‘ldi. Umar Abdulramon mazkur uchrashuvning eng yaxshi futbolchisi deb topildi.
“Qarshiga uch ochkoni qo‘lga kiritish maqsadida kelgandik, aynan g‘alaba bizni keyingi bosqichga chiqish masalamizni hal qilardi. Afsuski tezkor gol rejalarimizni buzib yubordi. Tezkor gol o‘tkazib yuborgan bo‘lsa-da, ‘Al-Ayn’ o‘yinni tezda o‘z qo‘liga oldi”, — dedi amirlik futbolchi.
“D” guruhida so‘nggi — 6-tur uchrashuvlari 3-may kuni bo‘lib o‘tadi. Shu kuni “Nasaf” BAAda “Al-Ayn” mehmoni bo‘ladi. “Nasaf” hisobida hozircha 5, “Al-Ayn” hisobida 7 ochko bor. Guruhda Qatarning “Al-Jaish” 10 ochko bilan peshqadamlik qilmoqda, so‘nggi o‘rindagi “Al-Ahli” (Saudiya Arabistoni) hisobida 3 ochko bor.
Izoh (0)