Britaniyalik bokschi Entoni Joshua Xalqaro boks federatsiyasi (IBF) versiyasi bo‘yicha superog‘ir vazn toifasida jahon chempioniga aylandi. 10-aprelga o‘tar kechasi London shahrida bo‘lib o‘tgan 12 raundlik jangning ikkinchi raundida Entoni Joshua AQSh vakili Charlz Martinni nokautga uchratdi, deb xabar beradi “TASS”.
26 yoshli Joshua professional ringda o‘zining 16-jangida chempionlik kamarini qo‘lga kiritishga muvaffaq bo‘ldi. U o‘tkazgan 16 ta jangining barchasida nokaut bilan zafar quchgan va biror marta ham mag‘lubiyatga uchramagan. Britaniyalik bokschi superog‘ir vaznda Olimpiada chempioni (London–2012) maqomida professional boksdagi eng nufuzli versiyalaridan birida chempionlik kamarini qo‘lga kiritgan birinchi bokschi bo‘ldi.
Avvalroq bunday natijaga, ammo turli vazn toifalarida Muhammad Ali, “Shugar” Rey Leonard, Oskar de la Xoyya va Floyd Patterson erishgan.
Qayd etish kerakki, IBF kamarini boy bergan amerikalik Charlz Martin ilk bor chempionlik kamarini himoya qila olmadi. So‘nggi bor Martin joriy yilning yanvar oyida ukrainalik Vyacheslav Glazkovga qarshi jang o‘tkazib, 3-raundda raqibini nokautga uchratgan edi. Entoni Joshuadan uchralgan mag‘lubiyat Martin uchun professional boksdagi birinchisi bo‘ldi. Bundan avval u 23 ta g‘alaba (21 tasi nokaut bilan) va bitta durang qayd etgandi.
Ma’lumot o‘rnida, superog‘ir vazn toifasida boshqa nufuzli versiyalarda britaniyalik Tayson Fyuri (WBA, WBO) hamda AQSh vakili Deontey Uaylder (WBC) jahon chempioni hisoblanadi.
Izoh (0)