Toshkent vaqti bilan 7-aprelga o‘tar kechasi futbol bo‘yicha Yevropa Chempionlar Ligasi chorak final dastlabki uchrashuvlari doirasida navbatdagi ikki o‘yin — “Volfsburg” (Germaniya) — “Real Madrid” (Ispaniya) hamda “PSJ” (Fransiya) — “Manchester Siti” (Angliya) bahslari bo‘lib o‘tdi.
“Volfsburg” — “Real Madrid” 2:0
O‘yindan avval ko‘pchilik “Real”ning imkoniyatlarini yaqqol yuqori baholagan edi.
Biroq hisob “Volfsburg” tomonidan ochildi — Kazemironing qo‘polligi uchun belgilangan penaltidan Rodriges aniq foydalandi.
So‘ng, birinchi taymning o‘zida, Arnold “Volfsburg”ning ajoyib kombinatsiyasini gol bilan yakunladi — 2:0.
“Real” — shokda.
Ronaldu ham hech narsa qila olmadi.
12-aprel kuni bo‘ladigan javob uchrashuvida qanday natija qayd etilishidan qat’iy nazar, “Volfsburg” o‘z ishqibozlarini rostmana xursand qila oldi.
“PSJ” — “Manchester Siti” 2:2
Chorak finalning eng ko‘p kutilgan to‘qnashuvi barcha umidlarni oqladi.
Kutilmagan start — Ibragimovich penaltidan gol ura olmadi.
“Sen urmasang, senga urishadi” degandek, Kevin De Bryuyne ham hisobni ochdi, ham “Manchester Siti”ni hisobda oldinga olib chiqdi.
Lekin Manchester klubi ishqibozlari ko‘p xursand bo‘lishmadi — Fernandoning qo‘pol xatosidan unumli foydalanib, Ibragimovich tablodagi muvozanatni tikladi.
Ikkinchi bo‘limda “PSJ” hisobda oldinga chiqib oldi — o‘z vaqtida “Manchester Siti”da ham o‘ynashga ulgurgan Rabyo gol urdi.
Lekin 72-daqiqada Fernandinyo hisobni tenglashtirishdi — 2:2.
To‘qnashuvning davomi endi 12-aprel kuni Manchesterda bo‘ladi.