Британиялик боксчи Энтони Жошуа Халқаро бокс федерацияси (IBF) версияси бўйича супероғир вазн тоифасида жаҳон чемпионига айланди. 10 апрелга ўтар кечаси Лондон шаҳрида бўлиб ўтган 12 раундлик жангнинг иккинчи раундида Энтони Жошуа АҚШ вакили Чарльз Мартинни нокаутга учратди, деб хабар беради «ТАСС».
26 ёшли Жошуа профессионал рингда ўзининг 16-жангида чемпионлик камарини қўлга киритишга муваффақ бўлди. У ўтказган 16 та жангининг барчасида нокаут билан зафар қучган ва бирор марта ҳам мағлубиятга учрамаган. Британиялик боксчи супероғир вазнда Олимпиада чемпиони (Лондон–2012) мақомида профессионал боксдаги энг нуфузли версияларидан бирида чемпионлик камарини қўлга киритган биринчи боксчи бўлди.
Аввалроқ бундай натижага, аммо турли вазн тоифаларида Муҳаммад Али, «Шугар» Рэй Леонард, Оскар де ла Хойя ва Флойд Паттерсон эришган.
Қайд этиш керакки, IBF камарини бой берган америкалик Чарльз Мартин илк бор чемпионлик камарини ҳимоя қила олмади. Сўнгги бор Мартин жорий йилнинг январь ойида украиналик Вячеслав Глазковга қарши жанг ўтказиб, 3-раундда рақибини нокаутга учратган эди. Энтони Жошуадан учралган мағлубият Мартин учун профессионал боксдаги биринчиси бўлди. Бундан аввал у 23 та ғалаба (21 таси нокаут билан) ва битта дуранг қайд этганди.
Маълумот ўрнида, супероғир вазн тоифасида бошқа нуфузли версияларда британиялик Тайсон Фьюри (WBA, WBO) ҳамда АҚШ вакили Деонтей Уайлдер (WBC) жаҳон чемпиони ҳисобланади.
Изоҳ (0)