Rossiya Federatsiyasi Tergov qo‘mitasi Rostov-Donda Boeing 737-800 qulashi bo‘yicha jinoiy ish ochdi. Bu haqda qo‘mitaning rasmiy vakili Vladimir Markin ma’lum qilgan, deya xabar beradi “Interfaks”.
Jinoiy ish “Ehtiyotsizlik tufayli ikki hamda undan ortiq kishining o‘limiga sabab bo‘lgan harakat va havo transportidan foydalanish xavfsizligi qoidalarining buzilishi” moddasi bo‘yicha qo‘zg‘atilgan.
Halokat joyiga Tergov qo‘mitasi rahbarining o‘rinbosari Boris Karnauxov boshchiligida qo‘mitaning 50 nafar xodimi yuborilgan. Mutaxassislar kuchaytirilgan maxsus kriminalistik guruh tarkibiga kirgani bildirilmoqda.
Eslatib o‘tamiz, 19-mart, shanba kuni FlyDubai aviakompaniyasiga tegishli Boeing 737-800 layneri Rossiyaning Rostov-Don shahri aeroportiga qo‘nish vaqtida halokatga uchradi. Hodisa oqibatida samolyot bortida bo‘lgan barcha yo‘lovchilar va ekipaj a’zolari halok bo‘lgan.
Izoh (0)