BMT Shimoliy Koreyani majburiyatlariga rioya etish va provokatsiyalarni to‘xtatishga chaqirdi
BMT KXDR tomonidan ballistik raketalar uchirilganidan so‘ng Koreya yarim orolida yuzaga kelayotgan vaziyatdan chuqur tashvishlanish bildiradi va Pxenyanni “g‘alamislik harakatlari”ni to‘xtatishga chaqiradi. Bu haqda xalqaro tashkilot bosh kotibining rasmiy vakili Stefan Dyujarrik ma’lum qildi, deya xabar beradi “TASS”.
“Koreya yarim orolidagi vaziyat, xususan, KXDR tomonidan raketalar uchirilgani chuqur tashvish uyg‘otadi. Biz Shimoliy Koreyani yana bir bor o‘z majburiyatlari, jumladan, Xavfsizlik kengashi rezolyutsiyalari doirasidagi majburiyatlariga rioya etish va provokatsiyalarni to‘xtatishga chaqiramiz”, — deya ta’kidlagan Dyujarrik. Bosh kotib rasmiy vakilining bildirishicha, BMT mintaqada vaziyat rivojini diqqat bilan kuzatib boradi.
Eslatib o‘tamiz, Shimoliy Koreya 17-mart, payshanba kuni kechki payt Yaponiya dengiziga qarata o‘rta masofaga parvoz qiluvchi ikki ballistik raketani uchirgan. KXDR 10-mart kuni ham mazkur dengizga kichik masofadagi ikki ballistik raketani yo‘llagandi.
