“Qiynoqlarning oldini olish qo‘mitasi” tomonidan uyushtirilgan press-tur doirasida Ingushetiya va Chechenistonga borgan qo‘mita xodimlari, norvegiyalik va shvetsiyalik jurnalistlar, The New Times hamda “Mediazona” muxbirlari, jami 8 kishidan iborat guruh ikki respublika chegarasida kaltaklandi, ular tushgan mikroavtobus esa yoqib yuborildi. Bu haqda “RBK” xabar bermoqda.
Jurnalistlarning bildirishicha, o‘ndan ziyod niqobli kimsalar bir necha yengil avtomobilda mikroavtobus yo‘lini to‘sib, mashinadan huquq himoyachilari va muxbirlarni tushirgan. Ularni “Sizlar terrorchilarni himoya qilyapsiz”, deya kaltaklab, mikroavtobusni yoqib yuborgan, so‘ng Checheniston tomonga ketgan.
Mikroavtobusda bo‘lganlarning deyarli barchasi turli darajada jarohatlangan, ularning telefonlari tortib olingan, shaxsiy buyumlari va hujjatlari esa yonib ketgan. To‘rt kishi, jumladan, norvegiyalik va shvetsiyalik jurnalistlar, qo‘mita yuristi va haydovchi kasalxonaga yotqizilgan.
Ramzan Qodirovning matbuot kotibi Alvi Karimov ushbu hodisa haqida hech narsa eshitmaganini bildirgan. Qo‘mita yuristi Dmitriy Utkinning aytishicha, hujum Ingushetiya hududida sodir bo‘lgan. Ingushetiya huquq-tartibot idoralaridagi manbaning ta’kidlashicha, hozirda hujum uyushtirilganligi yuzasidan tekshiruv olib borilmoqda, hodisa joyida tezkor-tergov guruhi ishlamoqda, politsiya esa bezorilarni qo‘lga olishga harakat qilmoqda.
Izoh (0)