Ингушетия ва Чеченистон чегарасида ҳуқуқ ҳимоячилари ва журналистлар калтакланди, уларнинг микроавтобуси эса ёқиб юборилди

«Қийноқларнинг олдини олиш қўмитаси» томонидан уюштирилган пресс-тур доирасида Ингушетия ва Чеченистонга борган қўмита ходимлари, норвегиялик ва швециялик журналистлар, The New Times ҳамда «Медиазона» мухбирлари, жами 8 кишидан иборат гуруҳ икки республика чегарасида калтакланди, улар тушган микроавтобус эса ёқиб юборилди. Бу ҳақда «РБК» хабар бермоқда.

Журналистларнинг билдиришича, ўндан зиёд ниқобли кимсалар бир неча енгил автомобилда микроавтобус йўлини тўсиб, машинадан ҳуқуқ ҳимоячилари ва мухбирларни туширган. Уларни «Сизлар террорчиларни ҳимоя қиляпсиз», дея калтаклаб, микроавтобусни ёқиб юборган, сўнг Чеченистон томонга кетган.

Микроавтобусда бўлганларнинг деярли барчаси турли даражада жароҳатланган, уларнинг телефонлари тортиб олинган, шахсий буюмлари ва ҳужжатлари эса ёниб кетган. Тўрт киши, жумладан, норвегиялик ва швециялик журналистлар, қўмита юристи ва ҳайдовчи касалхонага ётқизилган.

Рамзан Қодировнинг матбуот котиби Альви Каримов ушбу ҳодиса ҳақида ҳеч нарса эшитмаганини билдирган. Қўмита юристи Дмитрий Уткиннинг айтишича, ҳужум Ингушетия ҳудудида содир бўлган. Ингушетия ҳуқуқ-тартибот идораларидаги манбанинг таъкидлашича, ҳозирда ҳужум уюштирилганлиги юзасидан текширув олиб борилмоқда, ҳодиса жойида тезкор-тергов гуруҳи ишламоқда, полиция эса безориларни қўлга олишга ҳаракат қилмоқда.