Ijtimoiy tarmoq foydalanuvchilari Ramzan Qodirovdan lavozimini tark etmasligini so‘rab aksiya uyushtirdi

Ijtimoiy tarmoqlar foydalanuvchilari #RamzanNeUxodi (“Ramzan ketma”) heshtegi ostida kampaniya boshladi, deya xabar bermoqda TJournal.

“Respublika rahbari mitinglar o‘tkazmaslikni so‘radimi, demak albatta hech kim ularni o‘tkazmaydi, biroq bunday aksiya internetda allqachon boshlandi, jadallashib bormoqda. Nima bo‘lganda ham, u Ramzan Qodirovga uni respublika aholisi ham, butun Rossiya aholisi ham qo‘llab-quvvatlashini ko‘rsatishdan iborat”, — dedi Checheniston yoshlari ittifoqi raisi Rustam Tapayev.

#RamzanNeUxodi heshtegi bir necha soat ichida Rossiya Twitter’i trendiga chiqdi. Teg bo‘yicha Chechenistonning amaldagi rahbariga qaratilgan, uning o‘z lavozimida qolishi so‘ralgan iltimoslarni, shuningdek, tanqid va hazillarni topish mumkin.

Qodirovning Checheniston Respublikasi rahbari lavozimidagi vakolati muddati 2016-yil 5-aprelda tugaydi.

Eslatib o‘tamiz, oldinroq Rossiya prezidenti matbuot kotibi Dmitriy Peskov Ramzan Qodirovning kelgusi taqdiri haqidagi qaror uning vakolati tugaganidan so‘ng qabul qilinishini bildirgandi.

Qodirovning o‘zi esa mamlakat rahbariyati uning o‘rniga boshqa kishini topishi zarurligini ma’lum qilgan, uning vakolatlarini uzaytirish uchun miting va boshqa aksiyalar o‘tkazmaslikni so‘ragan edi.