Hindistonning Maxarashtra shtati, Txane shahrida 28-fevral, yakshanbaga o‘tar kechasi 35 yoshli Xansil Varekar oilasining 14 nafar a’zosi, jumladan, sakkiz nafar bolani o‘ldirdi va joniga qasd qildi. Bu haqda The Indian Express nashriga tayanib, “RBK” xabar berdi.
Fojia arafasida oilada mehmondorchilik o‘tkazilgan va qarindoshlarning aksar qismi tunash uchun uyda qolgandi.
“Qotil uy eshiklari, chiqish joylarini mahkamlab tashlaganini taxmin qilish mumkin. Shundan so‘ng uxlab yotgan oilasining barcha a’zolarini jasadi yonidan topilgan pichoq bilan so‘yib tashlagan. Keyin o‘zini osib o‘ldirgan”, — deya hikoya qiladi mahalliy politsiya komissari Ashutosh Dumbare.
Ota-onasi, uch nafar singlisi, xotini va sakkiz nafar bola Varekarning qurboni bo‘ldi. Og‘ir yaralangan singillaridan biri qichqirib, yordamga chaqira boshlagan. Bu qichqiriqlarni qo‘shni uyda yashovchi oilaning yana bir qarindoshi eshitib, eshikni ochishga harakat qilgan. Biroq eshik tambalangani sababli ichkariga kirolmagach, deraza panjarasini buzib, uyga kirgan va fojiaga guvoh bo‘lgan. Uyda bo‘lganlardan faqat bir ayol tirik qolgan va u shifoxonaga yotqizilgan.
Mazkur jinoyatga undagan sabablar hozircha ma’lum emas, politsiya tekshiruv olib bormoqda.
Oldinroq AQShning Vashington shtatida erkak oilasining to‘rt nafar a’zosini otib o‘ldirgach, o‘z joniga qasd qilgani xabar berilgandi.
Izoh (0)