Isroil sobiq bosh vaziri Exud Olmert mamlakat tarixida qamoqqa olingan ilk davlat rahbari sifatida, 15-fevral, dushanba kuni korrupsiya va odil sudlovga to‘sqinlik qilish ishlari bo‘yicha belgilangan jazoni o‘tay boshlaydi. Bu haqda “RIA Novosti” xabar qilmoqda.
Olmert Tel-Aviv shahri yaqinidagi “Maasiyagu” qamog‘ida 19 oy o‘tiradi. U Quddusdagi nufuzli “Xolilend” aholi turar-joy kompleksining qurilishini qo‘llab-quvvatlash uchun pora olganligi uchun 1,5 yil muddatga ozodlikdan mahrum qilingan. Shuningdek, tergov davomida unga qarshi ko‘rsatma bermaslikni so‘rab kotibiyat boshlig‘i Shul Zakenga pul taklif qilganligi sababli 70 yoshli sobiq bosh vazirga bir oy qamoq muddati qo‘shib berilgan.
Isroil qamoqlari boshqarmasining ta’kidlashicha, Olmert “ayrim sabablarga ko‘ra oddiy mahbuslar bilan saqlab bo‘lmaydigan mahbus” sifatida “10-blok”ga joylashtiriladi. Bu yerda unga zo‘rlash jinoyatini sodir etganlikda ayblanib yetti yilga ozodlikdan mahrum qilingan Isroil sobiq prezidenti Moshe Katsav hamroh bo‘ladi.
Eslatib o‘tamiz, Isroil Oliy sudi Olmertning korrupsiya ishi bo‘yicha bergan apellyatsiyasini qisman qanoatlantirganligi haqida xabar qilingan edi.
Izoh (0)