Oq uy saytida AQShning amaldagi prezidenti Barak Obamani sud qilish talab qilingan petitsiya paydo bo‘ldi. Petitsiya mualliflari davlat rahbarini Gaagadagi Xalqaro jinoyat sudida “harbiy jinoyatchi” sifatida sud qilishni talab qilmoqda, deb xabar beradi “RBK”.
Petitsiya joylangan vaqtda unga 1992 kishi imzo qo‘ygan edi. Murojaat AQSh prezidenti ma’muriyati tomonidan ko‘rib chiqilishi uchun u 9-martga qadar 100 mingta imzo yig‘ishi kerak.
Murojaat mualliflari “Obama nafaqat AQSh fuqarolari, balki butun dunyo oldidagi jinoyatlari uchun aybdor ekanligi”ni ta’kidlamoqda. Ular Obamaning tajovuzi tufayli Liviya yakson bo‘lgan, Amerika prezidentining “agentlari” esa Suriyada “o‘rtamiyona muxolifat” niqobi ostidagi terrorchilik guruhlarini tashkil qilib, ularni moliyalashtirmoqda, deb hisoblamoqda.
Mualliflar mamlakat xavfsizlik xizmati fuqarolar haqidagi shaxsiy ma’lumotlarni sutkasiga 24 soat yig‘ishida ham Obamani ayblamoqda. Petitsiyada Guantanamo qamoqxonasi Obamaning 2008-yilda bergan va’dasiga qaramay, hozirgacha yopilmagani ham yodga olingan.
Izoh (0)