Zika virusi Shimoliy va Janubiy Amerikada tarqalib ketib, Kanada va Chilining kontinent qismidan tashqari barcha mamlakatlarga kirib borishi mumkin, deya xabar bermoqda “TASS” Jahon sog‘liqni saqlash tashkilotiga tayanib.
Janubiy Amerikada virus bilan kasallanish holatlari ilk bor 2015-yil mayida Braziliyada qayd etilgan edi, hozirda esa zika 21 ta mamlakatga tarqalib bo‘lgan.
JSST ma’ruzasida keltirilishicha, virusning tezkorlik bilan tarqalishiga ikki omil sababchi bo‘lmoqda, bular — Shimoliy va Janubiy Amerika aholisi bungacha zika bilan to‘qnash kelmaganligi sababli unga qarshi immuniteti yo‘qligi hamda asosiy virus tarqatuvchi — Aedes aegypti chivini mintaqaning Kanada va Chilining kontinent qismidan tashqari barcha mamlakatlarida mavjudligidir.
Tashkilot ushbu chivin tarqalgan hududlarda yashovchilarga o‘zlarini uning nishidan himoya qilishga chaqirdi. Xususan, iloji boricha och rangdagi, badanni maksimal darajada yopib turadigan kiyimlarni kiyish, uyda chivinga qarshi to‘rlardan foydalanish, eshik va derazalarni yopish tavsiya etildi.
Izoh (0)