O‘zbekiston kasaba uyushmalari Federatsiyasi Kengashi (O‘zKUFK) Yuridik klinikasi Mehnat kodeksining yigirma yilligi munosabati bilan “Mehnat kodeksini bilasizmi?” onlayn viktorinasini e’lon qildi. Bu haqda O‘zKUFK portali xabar berdi.
Huquqiy va siyosiy madaniyatni oshirish, milliy va xalqaro mehnat standartlarining mazmun-mohiyatini targ‘ib qilish maqsadida o‘tkazilayotgan viktorinada yoshi, ma’lumoti, o‘qish yoki ish joyidan qat’iy nazar barcha fuqarolar ishtirok etishlari mumkin.
Viktorina Mehnat kodeksi qabul qilinganligiga yigirma yil to‘lgan sana — 2015-yil 21-dekabr kunidan boshlanib, Mehnat kodeksi kuchga kirganligiga yigirma yil to‘lgan sana — 2016-yil 1-aprel kuniga qadar jami 10 bosqichda o‘tkaziladi.
Har bir bosqichda ishtirokchilarga 8 ta test va 2 ta muammoli savol (kazus) beriladi. Ishtirokchilar savollarga muayyan vaqt ichida javob berishlari lozim. Test savollari uchun 15 daqiqa, kazuslar uchun esa 20 daqiqa vaqt beriladi. Xabar berishlaricha, har bir turda savollarga faqat bir marta javob berish mumkin; savollar o‘zbek va rus tillarida berib boriladi.
Viktorinaning bosh sovrini — Apple iPhone 6 smartfoni bo‘lib, shuningdek, noutbuk, planshet va yana boshqa qimmatbaho sovg‘alar sovrin sifatida ham qo‘yilgan. Viktorina haqida batafsil ma’lumotlarni va unda ishtirok etish shartlari bilan maxsus sayt — viktorina.yk.uz’da tanishish mumkin.
Izoh (0)