Ўзбекистон касаба уюшмалари Федерацияси Кенгаши (ЎзКУФК) Юридик клиникаси Меҳнат кодексининг йигирма йиллиги муносабати билан «Меҳнат кодексини биласизми?» онлайн викторинасини эълон қилди. Бу ҳақда ЎзКУФК портали хабар берди.
Ҳуқуқий ва сиёсий маданиятни ошириш, миллий ва халқаро меҳнат стандартларининг мазмун-моҳиятини тарғиб қилиш мақсадида ўтказилаётган викторинада ёши, маълумоти, ўқиш ёки иш жойидан қатъий назар барча фуқаролар иштирок этишлари мумкин.
Викторина Меҳнат кодекси қабул қилинганлигига йигирма йил тўлган сана — 2015 йил 21 декабрь кунидан бошланиб, Меҳнат кодекси кучга кирганлигига йигирма йил тўлган сана — 2016 йил 1 апрель кунига қадар жами 10 босқичда ўтказилади.
Ҳар бир босқичда иштирокчиларга 8 та тест ва 2 та муаммоли савол (казус) берилади. Иштирокчилар саволларга муайян вақт ичида жавоб беришлари лозим. Тест саволлари учун 15 дақиқа, казуслар учун эса 20 дақиқа вақт берилади. Хабар беришларича, ҳар бир турда саволларга фақат бир марта жавоб бериш мумкин; саволлар ўзбек ва рус тилларида бериб борилади.
Викторинанинг бош соврини — Apple iPhone 6 смартфони бўлиб, шунингдек, ноутбук, планшет ва яна бошқа қимматбаҳо совғалар соврин сифатида ҳам қўйилган. Викторина ҳақида батафсил маълумотларни ва унда иштирок этиш шартлари билан махсус сайт — viktorina.yk.uz’да танишиш мумкин.
Изоҳ (0)