Ukrainaning Odessa viloyati gubernatori, Gruziya sobiq prezidenti Mixail Saakashvili o‘zini axloq doirasida va madaniyat bilan tutishni bilmaydigan hukumat uchun Ukraina xalqidan uzr so‘radi, deb yozadi “Segodnya.ua”.
“… O‘zim bir vakili bo‘lgan hukumat sizni bunday vaziyatga qo‘ygani uchun uzr so‘rayman. Men ko‘pincha o‘zini axloq va madaniyat doirasida tuta olmaydigan, hammani pastga urib, o‘zini va mamlakatni kulgiga qo‘yadigan hukumat uchun uzr so‘rayman. Men hukumatdagilarning barchasi nomidan gapirmayapman, lekin uning katta qismini nazarda tutyapman, u, shu jumladan, hukumat rahbarini ham o‘z ichiga oladi. Hamma narsani to‘s-to‘polon va sirk tomoshasiga aylantirib yuborishganidan afsusdaman”, — dedi Saakashvili 14-dekabr, dushanba kuni Kiyevda Milliy islohot kengashi majlisi yakunlariga bag‘ishlangan brifingda.
Eslatib o‘tamiz, Ukraina ichki ishlar vaziri Arsen Avakov Milliy islohot kengashi yig‘ilishi davomida yuzaga kelgan mojaroda Odessa viloyati ma’muriyati rahbari Mixail Saakashvilining yuziga suv sepib yuborgandi. Ukraina IIV rahbarining so‘zlariga qaraganda, Odessa rahbari barchaga, jumladan prezidentga ham biror narsa deyish uchun imkon bermagan.
Izoh (0)