Ukraina hukumati Qrimga mahsulotlar va xizmatlar yetkazib berish, shuningdek, yarimoroldan tovar va xizmatlar keltirilishini man etuvchi qaror qabul qiladi. Bu haqda hukumatning 16-dekabr, chorshanba kuni bo‘lib o‘tgan majlisida bosh vazir Arseniy Yatsenyuk ma’lum qildi, deya xabar beradi “Korrespondent.net”.
“Shaxsiy buyumlar, ijtimoiy qiymatga ega oziq-ovqat mahsulotlari va gumanitar yordamdan tashqari barcha tovar va xizmatlar yetkazib berilishi taqiqlanadi. Qrimga elektr energiyasi berilishini davom ettirish to‘g‘risidagi qarorni Milliy xavfsizlik va mudofaa kengashi qabul qiladi”, — deya ta’kidlagan Yatsenyuk.
Qaror qabul qilingan kundan boshlab 30 kundan keyin kuchga kiradi.
Oldinroq, 23-noyabrda Ukraina prezidenti Pyotr Poroshenko Qrim bilan savdo va transport aloqasini to‘xtatishni taklif qilgandi.
Izoh (0)