Politsiya Nyu-Yorkdagi zargarlik do‘konidan bir necha million dollarlik brilliantlar o‘g‘irlanishini fosh etdi. New York Post gazetasining ma’lum qilishicha, g‘ilofda bo‘lgan qimmatbaho toshlar anglashilmovchilik tufayli tashlab yuborilgan. Ulardan bir qismi o‘z egasiga — J. Birnbaum xususiy firmasiga qaytarildi, deya xabar beradi “TASS”.
Tergovda aniqlanishiga ko‘ra, Manxettendagi qo‘p qavatli binoda joylashgan zargarlik buyumlari do‘koni brilliantlar yo‘qolgan kun boshqa qavatga ko‘chib o‘tgan. Yukchilar qimmatbaho toshlar joylashtirilgan uchta ko‘zga tashlanmas qutini keraksiz deb hisoblab, axlatga tashlab yuborgan. Ularni 24-noyabr kuni bino qo‘riqchisi Uilfred Martines topib, o‘ziga olib qolgan.
47 yoshli Martines binoning uchinchi qavatiga o‘rnatilgan kuzatuv kameralari orqali payqab qolindi. 14-dekabr, dushanba kuni politsiya uni hibsga oldi. Qo‘riqchi so‘roq chog‘ida aybini tan olgan va 3,2 million dollar turadigan 17 qirotli brilliant, qiymati pastroq bo‘lgan bir necha qimmatbaho tosh va 10 ming dollar naqd pulni qaytarib bergan. Qolgan qimmatbaho toshlarni u J. Birnbaum do‘koni joylashgan binodagi boshqa zargarga o‘tkazishga ulgurgan ekan.
Qo‘riqchi sud oldida javob beradigan bo‘ldi, politsiya esa egasi 5 milliondan 10 million dollargacha baholagan qolgan brilliantlarni qidirmoqda.
Izoh (0)