Qozog‘iston Jahon savdo tashkilotining to‘la huquqli a’zosiga aylanmoqda, biroq respublika uchun og‘ir sinovlar davri boshlanmoqda. Bu haqda Qozog‘iston prezidenti Nursulton Nazarboyev xalqqa murojaatida aytib o‘tdi, deb yozadi “TASS”.
“Bugun, 30-noyabr kuni Qozog‘iston de-yure (qonuniy asosda) JSTning to‘la huquqli a’zosiga aylanadi. Bu haqda JST Bosh Assambleyasi majlisida rasman e’lon qilinadi”, — dedi Nazarboyev.
Shu bilan birga, Nazarboyev ayni paytda “yangi risklar yangi imkoniyatlar bilan uyg‘unlashadigan keskin va og‘ir davr kelayotgani”ni ham ta’kidladi.
“Yetakchi mamlakatlar qarama-qarshiligi, bir-biriga sanksiyalar kiritish butun dunyoni boshi berk ko‘chaga yetaklamoqda, — deya qayd etdi u. — Qozog‘istonning asosiy eksport mahsulotining jahon bozoridagi qiymati bir necha marta pasaydi”.
Ostona JSTga a’zo bo‘lish haqidagi arizani 1996-yil 29-yanvarda bergan edi. 10-iyun kuni mamlakatning tashkilotga qo‘shilish shartlari haqidagi muzokaralar yakunlandi. Qozog‘istonning JSTga a’zo bo‘lishi bo‘yicha hujjatlar paketi loyihasi tashkilot ishchi guruhiga rasman tasdiqlash uchun 22-iyun kuni topshirilgan edi.
Izoh (0)