AQShning 22 ta shtatidagi bir nechta okruglar va 50 ta shaharda jonivorlarning sirk shoularidagi ishtiroki cheklanmoqda yoki to‘liq taqiqlanmoqda, deb yozadi National Geographic. Biroq bungacha hali hech qaysi shtat bunday qonunni butun hududi uchun joriy qilmagan edi.
Ushbu g‘oyani birinchi bo‘lib Gavayi amalga oshiradi: Qishloq xo‘jalik departamenti o‘tgan hafta bir ovozdan tegishli qonunni ma’qulladi. Sirk, karnaval, yarmarka va boshqa ko‘ngilochar tadbirlarda “ishlash” majburiyatidan ozod etiladigan jonivorlar ro‘yxatiga yirik mushuksimonlar, maymunlar, fillar, karkidonlar, begemotlar, ayiqlar, sirtlonlar va timsohlar kiritildi.
Bunday chora Gavayida anchadan buyon kutilayotgan edi. Gap shundaki, Gonoluluda 1994-yili Tayk laqabli Afrika fili tomosha chog‘ida dressirovkachi va uning yordamchisini bosib-yanchib tashlagan, so‘ng ko‘chaga yugurib chiqqan edi. Politsiya quturgan filni ta’qib qilib, unga 86 marta o‘q uzgan, natijada jonivor nobud bo‘lgan edi.
Hayvon himoyachilari Tayk avval ham aqldan ozish belgilarini namoyon qilgani, biroq sirk ma’muriyati ishni bosdi-bosdi qilib, vaqtida chora ko‘rmaganini ta’kidlab keladi.
Izoh (0)