Isroil bosh vaziri Binyamin Netanyaxuning yangi matbuot kotibi Ran Barats AQSh prezidenti Barak Obamani antisemitizm (yahudiylarga qarshi dushmanlik siyosati)da ayblab hamda Jon Kerrining aqlini 12 yoshli bolaniki bilan solishtirib yozgan gaplari uchun uzr so‘radi. Bu haqda Meduza xabar bermoqda.
Barats Binyamin Netanyaxuni bu gaplari haqida oldindan ogohlantirmagani uchun afsus bildirdi va o‘zining yangi rasmiy lavozimida bunday gaplarga boshqa yo‘l qo‘ymasligiga ishontirdi.
Netanyaxu Baratsning bayonotini nomaqbul deb atadi va uning matbuot kotibi lavozimiga tayinlanishi haqidagi qarorni qaytadan ko‘rib chiqishga va’da berdi.
Nashr eslatishicha, 2015-yil martida Netanyaxu Kongressda Eron yadro dasturi bo‘yicha kelishuv yuzasidan nutq so‘zlab chiqqach, Ran Barats Obamani antisemitizmda ayblagan edi. Isroil kelishuvga qarshi chiqqach, Obama Netanyaxu hech qanday muqobil variant taklif qilmayotganini aytgan edi.
Jon Kerrining “aqliy yoshi 12 yoshdan oshmaydi” degan jumlani esa Barats internet-nashrlardan biri uchun yozgan maqolasida qistirib o‘tgan edi.
Izoh (0)