Исроил бош вазири Биньямин Нетаньяхунинг янги матбуот котиби Ран Барац АҚШ президенти Барак Обамани антисемитизм (яҳудийларга қарши душманлик сиёсати)да айблаб ҳамда Жон Керрининг ақлини 12 ёшли боланики билан солиштириб ёзган гаплари учун узр сўради. Бу ҳақда Meduza хабар бермоқда.
Барац Биньямин Нетаньяхуни бу гаплари ҳақида олдиндан огоҳлантирмагани учун афсус билдирди ва ўзининг янги расмий лавозимида бундай гапларга бошқа йўл қўймаслигига ишонтирди.
Нетаньяху Барацнинг баёнотини номақбул деб атади ва унинг матбуот котиби лавозимига тайинланиши ҳақидаги қарорни қайтадан кўриб чиқишга ваъда берди.
Нашр эслатишича, 2015 йил мартида Нетаньяху Конгрессда Эрон ядро дастури бўйича келишув юзасидан нутқ сўзлаб чиққач, Ран Барац Обамани антисемитизмда айблаган эди. Исроил келишувга қарши чиққач, Обама Нетаньяху ҳеч қандай муқобил вариант таклиф қилмаётганини айтган эди.
Жон Керрининг «ақлий ёши 12 ёшдан ошмайди» деган жумлани эса Барац интернет-нашрлардан бири учун ёзган мақоласида қистириб ўтган эди.
Изоҳ (0)