Fransiyaning Charlie Hebdo gazetasida Rossiyaning A321 layneri halokati mavzusida karikaturalar chop etilgach, Rossiya Twitter’ida #YaNeSharli (“Men Sharli emasman”) heshtegi topga chiqdi, deya xabar bermoqda “RIA Novosti”.
Internet foydalanuvchilari Charlie Hebdo’ning xatti-harakatlariga nisbatan qat’iy norozilik bildirmoqda.
Kremldagilar esa karikaturalarning chop qilinishini “tahqirlash” deb atadi. “Buning na demokratiyaga, na o‘z fikrini erkin ifoda qilishga, hech narsaga bog‘liqligi yo‘q — bu tahqirlash”, — deya ta’kidladi Rossiya prezidenti matbuot kotibi Dmitriy Peskov.
Avvalroq Rossiya Tashqi ishlar vazirligi rasmiy vakili Mariya Zaxarova Fransiyaning Charlie Hebdo satirik gazetasida Rossiyaning “Kogalimavia” kompaniyasiga tegishli A321 yo‘lovchi samolyotining Misrdagi halokati haqidagi karikatura paydo bo‘lishini izohlab: “Yana kim Sharli?” — deb yozgan edi Facebook’dagi sahifasida.
Eslatib o‘tamiz, Rossiyaning “Kogalimavia” kompaniyasiga tegishli A321 yo‘lovchi samolyotining Misrdagi halokati fransuz satirik gazetasi Charlie Hebdo karikaturasiga mavzu sifatida xizmat qildi. O‘zining provokatsion maqolalari bilan tanilgan nashrning yangi sonida 224 kishini hayotdan olib ketgan fojia mavzusi birdaniga ikki suratda aks ettirilgan.
Izoh (0)