Fransiyaning haftalik gazetasi — Charlie Hebdo’ning bosh muharriri Jerar Biar tahqirlash tushunchasi nashr uchun mavjud emasligini aytdi, deb yozadi RFI. Bu bilan u Rossiya prezidenti matbuot kotibi Dmitriy Peskovning gapiga javob qaytardi.
Uning ta’kidlashicha, Rossiya samolyoti qulashiga bog‘liq tasvirlar fojia qurbonlari yoki faktlari ustidan kulish maqsadiga ega emas. “Bu rasmlarda karikatura personajlari yo‘q. Biz shunchaki hodisaga izoh berib, unga nisbatan nuqtai nazarimizni ko‘rsatyapmiz”, — dedi Biar.
Eslatib o‘tamiz, Rossiyaning “Kogalimavia” kompaniyasiga tegishli A321 yo‘lovchi samolyotining Misrdagi halokati fransuz satirik gazetasi Charlie Hebdo karikaturasiga mavzu sifatida xizmat qildi. O‘zining provokatsion maqolalari bilan tanilgan nashrning yangi sonida 224 kishini hayotdan olib ketgan fojia mavzusi birdaniga ikki suratda aks ettirilgan.
Kremldagilar karikaturalarning chop qilinishini “tahqirlash” deb atadi. “Buning na demokratiyaga, na o‘z fikrini erkin ifoda qilishga, hech narsaga bog‘liqligi yo‘q — bu tahqirlash”, — deya ta’kidladi Rossiya prezidenti matbuot kotibi Dmitriy Peskov.
Avvalroq Fransiyaning Charlie Hebdo gazetasida Rossiyaning A321 layneri halokati mavzusida karikaturalar chop etilgach, Rossiya Twitter’ida #YaNeSharli (“Men Sharli emasman”) heshtegi topga chiqqani xabar berilgan edi.
Izoh (0)