Toshkent shahrida so‘nggi bir necha kundan buyon benzin olish uchun katta navbatlar yuzaga kelayotgani munosabati bilan, Facebook ijtimoiy tarmog‘i foydalanuvchisi benzin uchun navbatga qanday turish kerakligi haqida hazilomuz eslatma-surat tayyorladi. Surat tarmoqdagi “Voditeli Tashkenta” guruhida e’lon qilingan.
“250 daqiqa mobaynida navbatda turarkanman, benzinga tezroq yetib borish uchun navbatning qaysi qatoriga turish haqida bosh qotiruvchilar uchun eslatma ishlab chiqdim”, — deb yozadi foydalanuvchi. Eslatmaga ko‘ra, agar shoxobchaga kirish uchun uch qatorlik navbat yuzaga kelgan bo‘lsa, tezroq benzin olish uchun yo‘l yoqasidagi eng birinchi qatorga turish kerak.
Foydalanuvchining qayd etishicha, ba’zan navbatda turgan haydovchilar boshqa qatordagi avtomobillarning navbati “juda tez” kelayotganini ko‘rib, “vaqti-vaqti bilan mashinadan tushib: ‘Balki mening qatorimdagilar hammasi mashinadan tushib, o‘z ishi bilan ketib qolgan bo‘lsa-chi?’, — degan xayol bilan oldindagi mashina haydovchilarini tekshirib qo‘ygisi kelib ketadi”.
Surat ostida fikr bildirganlar ba’zi foydalanuvchilar bu eslatma barcha yoqilg‘i quyish shoxobchalari uchun ham mos kelmasligi, bir qator shoxobchalarda eslatmada ko‘rsatilgan yechimning mutlaqo aksi samaraliroq ekanini qayd etib o‘tgan. Aksariyat foydalanuvchilar esa surat muallifini hazilomuz eslatma uchun olqishlagan.
Izoh (0)