Toshkentda MDHga a’zo davlatlar temir yo‘l transporti bo‘yicha Kengashining 63-majlisi boshlandi. Majlisda hamkorlikni yanada rivojlantirish, Kengashning avvalgi majlislari doirasida erishilgan kelishuvlar qanday amalga oshirilayotganiga oid masalalar muhokama etildi hamda shu yilning 9 oyi davomida bajarilgan ishlar sarhisob qilindi. Bu haqda O‘zA xabar bermoqda.
O‘tgan davrda Hamdo‘stlikka a’zo davlatlarning po‘lat izlari orqali 1,4 milliard tonna yuk tashilgani va bu qabul qilingan majburiyatlardan 15 foiz ko‘p ekani ta’kidlandi. Bundan tashqari, tashishlar o‘rtacha masofasi 3,5 foiz oshgani qayd etildi. O‘tgan vaqt mobaynida konteynerlarda 20 million tonna yuk tashildi va bu qabul qilingan majburiyatlardan 6,1 foiz ko‘pdir. 2015-yilning to‘qqiz oyida xalqaro yo‘nalishlarda xizmat ko‘rsatilgan yo‘lovchilar soni 14,8 million kishini tashkil etdi.
Tadbirda O‘zbekiston Respublikasi temir yo‘llarining hisobot davridagi faoliyatiga alohida e’tibor qaratildi. O‘zbekiston temir yo‘llari yuqori texnologiyalarga asoslangan zamonaviy transport tizimi bo‘lib, bugungi kunda ularning uzunligi 6 ming kilometrdan ziyodni tashkil etadi. Shu bois mamlakat Yevrosiyo transport makonida temir yo‘l orqali tashishni tashkil etish va tranzit yuklarni yetkazish, xalqaro transport koridorlari imkoniyatlaridan samarali foydalanishda muhim o‘rin tutmoqda.
Eslatib o‘tamiz, MDHga a’zo davlatlarning temir yo‘l transporti bo‘yicha Kengashi va uning ijroiya organi – Kengash direksiyasi 1992-yil 14-fevralda MDHga a’zo davlatlar hukumat rahbarlarining kelishuviga binoan tashkil etilgan.
Izoh (0)