Buxoro viloyati ko‘ptarmoqli tibbiyot markazida O‘zbekiston va janubiy koreyalik shifokorlar bemor bolalarni tibbiy ko‘rikdan o‘tkazdi, deb xabar qiladi O‘zA.
O‘zbekiston Respublikasi Sog‘liqni saqlash vazirligi hamda Janubiy Koreyaning Hyundai Engineering kompaniyasi hamkorligida tashkil etilgan tibbiy ko‘rikdan ko‘zlangan maqsad bolalar salomatligini mustahkamlash, kam ta’minlangan oilalardagi bemor bolalarni ijtimoiy va tibbiy jihatdan qo‘llab-quvvatlashdir.
Bu yerga kelgan xorijlik terapevt, pediatr, akusher-ginekolog, neyroxirurg va okulistlar uch kun davomida bolalar va keksalarni chuqurlashtirilgan tibbiy ko‘rikdan o‘tkazdi. Murojaat qilganlarning bir qismiga aniq tashxislar asosida davolanish bo‘yicha tavsiya bilan birga dori-darmon ham berildi.
Tibbiy ko‘rikda viloyat ko‘ptarmoqli tibbiyot markazining tegishli yo‘nalishlardagi shifokorlari ham ishtirok etdi. Bu ular uchun tajriba almashish, mahoratini oshirish imkonini yaratdi.
– Dunyoning ko‘plab davlatlarida bo‘lgan shifokor sifatida aytishim kerakki, O‘zbekistonda tibbiyot sohasida, uning moddiy-texnik bazasini mustahkamlash borasida ibratli ishlar amalga oshirilayotganiga guvoh bo‘ldim, – deydi janubiy koreyalik shifokor Kang Pyong Sok. – Viloyat ko‘ptarmoqli tibbiyot markazida barcha qulaylik yaratilgan bo‘lib, zamonaviy tibbiy jihozlar bilan ta’minlangan. Bu yerda barcha sharoit mavjudligi bois biz keltirgan tibbiy uskunalarga hojat ham qolmadi.
Izoh (0)