Uilyam Shekspirning afsonaviy “Globus” teatri 4-noyabr, chorshanba kuni O‘zbek Milliy akademik drama teatri sahnasida “Gamlet” pyesasini namoyish etdi. Teatrning Globe to Globe loyihasi doirasida O‘zbekistonga tashrifi O‘zbekistondagi Britaniya Kengashi, O‘zbekiston Madaniyat va sport ishlari vazirligi hamda “O‘zbekteatr” birlashmasi hamkorligida amalga oshirildi. Bu haqda UzDaily xabar bermoqda.
2 soatu 45 daqiqa davom etgan spektaklda 8 nafar aktyor 20 dan ziyod rol ijro etdi. U kutilmagan tarzda boshlandi: tomoshabinlar joylariga o‘tirishga ulgurmay aktyorlar sahnaga chiqib keldi, ulardan ayrimlari rekvizitlarni, ba’zilari esa sahna liboslarini to‘g‘rilay boshladi. Bir aktyor esa zalga tushib, muxlislar bilan muloqotga kirishib ketdi. Pyesa ingliz tilida, ruscha subtitr bilan namoyish etildi. O‘zbekistonlik muxlislar spektaklni ishtiyoq bilan tomosha qildi, yakunda ijrochilarni tik turib olqishladi.
Eslatib o‘tamiz, Shekspir tavalludining 450, vafot etganining 400 yilligi munosabati bilan “Globus” teatri 2014-yil 23-apreldan 2016-yil 23-aprelgacha davom etadigan ijodiy safarga chiqqan. Globe to Globe loyihasi doirasida teatr dunyoning 205 mamlakatida bo‘lishi ko‘zda tutilgan.
Izoh (0)