OAV: A321 komandiri halokatdan 3 oy avval tizimdagi xato sababli parvozni bekor qilgan

Misrning Sinay yarimorolida halokatga uchragan Rossiyaning A321 samolyoti komandiri bundan uch oy avval tizimdagi xato tufayli havo kemasi parvozini bekor qilishga majbur bo‘lgan. Bu haqda Sharm-ash-Shayx aeroportida samolyotni tekshirgan misrlik aviatexniklar guruhi vakili ma’lum qildi, deya xabar beradi “RIA Novosti”.

Aviatexnik Agence France-Presse agentligiga shanba kungi reysdan avval laynerda hech qanday muammo aniqlanmagani, biroq halokatdan uch oy oldin A321 “falokatga yaqin bo‘lgani” to‘g‘risida hikoya qilgan. Samolyot uchish-qo‘nish maydonining yarmiga yetganida havo kemasi komandiri “tizimdagi xato tufayli parvozni bekor qilishga majbur bo‘lgan”. Shu bilan birga, aviatexnik bunday vaziyatlar “deyarli odatiy holat” ekanligini ta’kidlagan.

Eslatib o‘tamiz, oldinroq CNN telekanali 2001-yili mazkur samolyot qo‘nish chog‘ida dum qismini jiddiy shikastlangani to‘g‘risida xabar bergandi.