Sankt-Peterburgda A321 halokati munosabati bilan motamni yana ikki kun — 2 va 3-noyabr kunlari ham davom ettirishga qaror qilindi. Bu haqda shahar gubernatori Georgiy Poltavchenko jurnalistlarga ma’lum qildi, deya xabar beradi “Vedomosti”.
Poltavchenko, shuningdek, 2-noyabr, dushanba kuni Sinay yarimorolida halok bo‘lganlarning oilasiga moddiy yordam ko‘rsatish yuzasidan tegishli qaror qabul qilinishini e’lon qildi. “Sankt-Peterburg hukumati, qayerda istiqomat qilganlaridan qat’iy nazar, barcha halok bo‘lganlarning oilasiga moddiy yordam ko‘rsatish masalasini ko‘rib chiqmoqda, — deya ta’kidlagan gubernator. — Qurbon bo‘lganlar orasida nafaqat shahar, balki Leningrad viloyati fuqarolari ham bor. Shuningdek, 34 kishi Rossiyaning boshqa mintaqalaridan, to‘rt kishi Ukraina, bir kishi esa Belarus fuqarosi. Ularning yaqinlari bilan aloqa o‘rnatilgan”.
Eslatib o‘tamiz, Misrda qulagan Airbus A321 qurbonlari xotirasiga 1-noyabr, yakshanba Rossiyada umummilliy motam kuni, deb e’lon qilingandi.
Izoh (0)