Buyuk Britaniya Afg‘onistondagi harbiy kontingenti faoliyatini bir yilga uzaytiradi. Bu haqda “RIA Novosti” xabar bermoqda.
“Buyuk Britaniya Afg‘oniston xavfsizlik kuchlariga Afg‘oniston xalqining xavfsizligini to‘liq ta’minlashga qodir to‘laqonli qo‘shinlarni tashkil etish uchun vaqt kerakligini tan oldi”, — deyiladi mamlakat mudofaa vaziri Maykl Fellonning Britaniya parlamentiga yo‘llagan maktubida.
“Afg‘onistonda xavfsizlik va barqarorlikni ta’minlashga yordam berish uchun mamlakatdagi Britaniya harbiy kontingenti hajmini 2016-yilda ham saqlab qolish kerak, deb hisoblaymiz”, — deya qayd etdi Fellon.
Hozirgi vaqtda Afg‘onistonda taxminan 450 nafar britaniyalik harbiy xizmat qilmoqda. Ular Afg‘oniston xavfsizlik kuchlari xodimlarini o‘qitish va NATOning Qobuldagi operatsiyalarini qo‘llab-quvvatlash bilan shug‘ullanmoqda.
Avvalroq AQSh prezidenti Barak Obama mamlakat qo‘shinlari (hozirgi vaqtda 9,8 ming kishi) 2016-yil oxirigacha ham Afg‘onistondan olib chiqilmasligi, 2016-yildan so‘ng ham Afg‘onistonda 5,5 ming nafar amerikalik harbiy qolishi haqida bayonot bergandi.
Izoh (0)