Буюк Британия Афғонистондаги ҳарбий контингенти фаолиятини бир йилга узайтиради. Бу ҳақда «РИА Новости» хабар бермоқда.
«Буюк Британия Афғонистон хавфсизлик кучларига Афғонистон халқининг хавфсизлигини тўлиқ таъминлашга қодир тўлақонли қўшинларни ташкил этиш учун вақт кераклигини тан олди», — дейилади мамлакат мудофаа вазири Майкл Фэллоннинг Британия парламентига йўллаган мактубида.
«Афғонистонда хавфсизлик ва барқарорликни таъминлашга ёрдам бериш учун мамлакатдаги Британия ҳарбий контингенти ҳажмини 2016 йилда ҳам сақлаб қолиш керак, деб ҳисоблаймиз», — дея қайд этди Фэллон.
Ҳозирги вақтда Афғонистонда тахминан 450 нафар британиялик ҳарбий хизмат қилмоқда. Улар Афғонистон хавфсизлик кучлари ходимларини ўқитиш ва НАТОнинг Қобулдаги операцияларини қўллаб-қувватлаш билан шуғулланмоқда.
Аввалроқ АҚШ президенти Барак Обама мамлакат қўшинлари (ҳозирги вақтда 9,8 минг киши) 2016 йил охиригача ҳам Афғонистондан олиб чиқилмаслиги, 2016 йилдан сўнг ҳам Афғонистонда 5,5 минг нафар америкалик ҳарбий қолиши ҳақида баёнот берганди.
Изоҳ (0)